必需品?家傭?


意大利來的小G每次都戴着尖頂冷帽,活像從故事書跳出來的小精靈。因為對許多物料嚴重敏感,小G在學校洗手要用私家肥皂,茶點總不能吃自己做的麵包。

那時我和G媽還在上陪太子讀書小組,逢星期三是麵包日,G媽會乘小G不覺,將同樣啡色同樣大小的薯仔換到小G碟上。見過小G,我方才驚覺世上原來有比整天哭鬧哭足一年更難纏難熬的事。

薯仔及其他各式各樣代替品都是從家裡帶來的,薯仔還是暖手。「如果沒家傭便大件事了。」我隨口搭訕。

「我們沒請家傭啊。」

嘩,我還以為自己好巴閉!

G媽法力無邊,不時帶來自製無敏感點心請客,就放在漂亮的竹簍上,也會送人從意大利帶來的蒜頭。

G媽在小露台給小G放了沙池,看在我這類多一事不如小一事的懶人眼類,她實在是不可思議的神仙。G媽每天都說受不了香港的污染,終於在忍了不夠年半後就留下G爸先行撤退,逃回佛羅倫思的樹下。

小C是小H的粉絲,開口埋口就是just like 小H、小H今天如何如何、小H呢?

比小C大一年的小H是個美人,眼睛好像比臉還大,一副楚楚可憐卻整天在打跟斗和攀高爬低,在學校自出自入獨立無比。最初看小H黑黑實實,我還道是南美人,遇上她的日本媽媽後才知她有個英國爸爸。

我之所以總遇不上H媽,是因為她總早到,我總超遲到。每早H媽都帶着小H弟弟送小H上學,有時更是徒步。

「弟弟不肯跟家傭嗎?」

「我們沒請家傭啊。」

一隻生番加一個豆丁加幾千尺大屋加一日三餐但沒家傭??

我開始想搵嶐捐。

不過,好戲在後頭,H媽當然不是要獨力照顧一隻生番加一個豆丁加幾千尺大屋加一日三餐,其實,她要照顧all of the above加小H的七歲哥哥。

有沒有家傭都各有利弊,但在香港沒有家傭,絕對是孤獨孤軍孤苦無比。

不時有人奇怪,為何在外國人家可以一媽帶五孩?關鍵就在「一媽」二字。

人家每戶都是一家一媽,那來一家一姐二姐甚至三姐?比如今天我好想吞pork洗個澡如個廁,鄰居阿May剛好英雌所望甚同,那就太好,今天一於我看兩家孩子妳如廁,明天妳看孩子我洗澡;今天我送孩子上學阿June去買菜,明天阿June接放學我跟老公去拍拖。那就是社區力量。

在香港嘛,別人連想也未想過世上竟有如此「問題」,別人都有一姐二姐三姐。(OK,OK,我知所有媽媽阿四讀者都會適當地親力親為,先別藐我嘛。)如非危急,我絕不敢以生番煩人,因為除了以身相許我實在無以為報,就算想報,人家也實在不需要。

沒家傭但有社區的孩子是真正由一條村帶大的,咱們的嘛,就是由七星拱照,圍着公轉供奉大的。

我之所以又在肆無忌憚亂吼,除了發揮阿四得罪人多本色之外,是因為我有以下招供:在下臨盆又在即,在這個沒社區也不需要社區之地,我終於向現實低頭,讓菲L姐下星期闖進我家,世界從此廿四小時不再一樣。

此姐不同好姐的姐,L姐是L遮,年紀不大但喊她阿遮當然自有因由,有空再說。至於鐘點好姐嘛,嘿嘿,她何止是姐,根本就是太后,不過暫時也是要保留--雖然她從來只洗廁所只拖地永不需帶孩子,不然生仔那天我突然荷爾蒙發顛炒了L遮,你叫我去哪裡如廁?

此後二姐一中一英攜手遮天,二少他日會否成大帝成大懶虫,為娘又是否仍是阿四,還看為娘做化。

26 則迴響

Filed under 阿四, 好姐

26 responses to “必需品?家傭?

  1. 我有沒有睇錯先?你家有兩個阿姐?

    先申報一下:我家也沒有家傭的。

  2. 你只得一名嘛。不過我就是說啊,在沒有人有家傭的地方,真的不需要家傭,你我就是大家的家傭大家的backup。在人人有家傭的地方呢,唉。

    其實不是二姐,我只有1.5個姐。L遮是菲姐,parttime的好姐暫時仍keep,因要睇定阿L遮是否能被收貨,否則到時我又生仔又想炒L遮,臨急搵邊個救我?
    經過唔瞓覺的生番C先例,我係打定輸數要自己24小時伺候阿二少,L遮如果要睇住每天只消失3小時的生番C又要做晒所有家務,又點可以幫我間不中睇阿二少呢?所以而家D人實行1姐per child,唉,實在是無可厚非。

  3. Jenni

    家傭…that is my job and the worst part is i am on call 24/7~lol

  4. 這個我本來也注意到,香港的現代家庭都算幾幸福,很多有家傭跟出跟入,在外地如在法有家傭的例子不多,頂多只是鐘點打掃啊...也來申報: 沒有鐘點也沒有家傭 。

  5. 納奧美

    係, 好認同 “一媽" & “社區力量"之說.

    我都係搬到這個社區, 沒做以前份工沒有了以前家中那個阿姐又多了個陀手lung腳的人仔後, 才深深體會到社區力量的可愛可貴. 除了互相搭配好能上學上街吞pork外, 我們還有婦孺餐~~晚飯桌上沒有爹爹的一眾 “一媽一孩", 歡聚一堂, 細路有得玩有得深切體會 “用膳氛圍", 大人有得煮有得食有得傾有得洗 (唔明以前的阿媽點解咁掂. 得我自己在家中一媽一孩時, 我通常都無啖好食).

    傍晚才剛從Maggie家接回行行, 嘩有其他小朋友同佢玩, 佢不知幾開心, 樂不思蜀. 心中暗忖: 這樣長大的小朋友, 係咪可以連playgroup都慳返? (假設我唔駛佢學拉丁文世界語草裙舞等十項全能)

    xxxxxxxxxxxx

    阿四你唔怕啦, 有阿姐和太后打點無關痛癢的雜務, 妳就可以傾盡無限愛心關心專心做小c和小d的阿四媽媽.
    取決的, 從來不是客觀環境, 而係
    態度.

  6. 我的納奧美:就是知道妳會明我想說甚麼。妳的婦孺餐,羨慕死!

    係,我就係覺得自己越來越燥,屈服找個遮仔來,讓自己得閑上上廁所洗個澡,對孩子對自己都好。

  7. pd

    仲有最緊要係有時間寫 Blog 來呻

  8. 很明白有兩個細路的滋味。我鄰居有兩件,如果不是對方的父母過來幫手湊吓,睇怕都幾惡搞。

    冇家傭的好處是,我可以成日同嚟我屋企的人講,我屋企好亂,大家唔好嚇親。

    講開「社區力量」,真是視乎你住在哪個社區和左鄰右里是些什麼人了。

    幸好現在多了一些有小朋友的夫婦搬來,阿包可以去鄰居的小朋友家裡吃喝玩樂。小朋友應該跟小朋友一起玩,我們這些忙到嘔的家長才可以透透氣,坐低暖吓個屁股。我有點不明白,為何要付錢去playground玩?我那時三唔識七在街上見到有人拖住差不多年紀的小朋友,就會上前搭訕,跟著話不如搵日一齊畀啲細路見面玩吓哩。

  9. 阿四, 我十分十分明白妳, 妳將有兩個生番要照顧, 有個人幫忙做啲雜務, 咁妳可以有多啲休息時間, 對自己好啲即係對全家人好啲。更重要係妳會有時間陪啲小C同弟弟。我都唔明, 响美國我又係自己湊, 返到嚟之後, 總覺得啲野做極都唔完, 少咗時間做自己野之餘, 最慘嘅係陪阿女嘅時間都少埋。所以都有諗請個家傭, 但我真係唔想同個三唔識七嘅人住囉。

  10. 小孜

    我想說,四,祇要你自己覺得舒服開心,Go Ahead,管它有沒有女傭。

    我覺得更多的是環境和文化的問題,像老早前在讀食那兒提過,在香港你說請人回家吃飯人家當你是怪物你說要去人家吃飯人家更當你是怪物,霍霍。

    人總是不自覺得隨環境而改變,不信?如果你有朋友長期在珠江三角洲的工廠長駐幾年你就明。

    四,我還第一次看到哭哭哭那篇,雖然是N多年的事,且早已哭盡甘來,我看了還是心疼。

  11. MAMA

    我一開始睇呢篇blog, 仲以為阿四想請菲姐但又唔想,於是找些實例來支持自己的諗法。原來你己經請了!

    由小b3個月開始菲姐到我家,至現在2歲3個月,老公時常呻個小的,送多1個大!極不喜歡多個外人在家的日子。好了,而家連偶像四四都要屈服,以後菲姐在我家的地位更穩固了! :>

    話時話,我估細佬一定會瞓得多過小c及不太愛哭…老人家話的-相反理倫! hehe…

  12. eeb

    對於外傭,我真的 很 抗 拒﹗

    未有bb前,有外傭的朋友會說:"到你有細路時就知,我都唔想請外傭,不過無辦法,我都唔鍾意有個外人住o係屋企… …(下刪100字),總之到時你就知。(苦笑)"

    有了bb後,當有外傭的朋友知道我無心做全職媽媽,就問:"外傭幾時到?"
    答曰:"無打算請"
    再問:"咁邊個邊你湊?"
    再答曰:"褓姆,我返工時佢邊我照顧bb。"
    “咁夜晚呢?"
    “放工同週末我自己湊番。"
    “嘩,夜晚好辛苦架bor,不如都係請工人啦﹗"
    “接受唔到… … (下刪100字)"
    “到時你就不得不屈服"

    過了差不多兩年,倔強的人仍不屈服
    朋友又問:"幾時整多件?"
    答曰:"希望今年"
    “咁仲唔請工人?"
    “到時Larry都返學,ok既"
    “返全日?"
    “返3個鐘"
    “吓,咁到時你夜晚一個湊兩個?"
    “到時再算囉"

    我好想話以前阿媽o個代都係咁,一個湊7個… …不過我講出黎無說服力,因為我阿媽返工,婆婆同工人湊我同哥哥。

    我仲想講偉大既世界不公平論,一個外傭引起兩個畸形家庭,及其他十個偉大理論,不過我不忍心,請外傭的媽媽已經有很多嘢要擔心,而且也有些人認為有能力請外傭係一件好勁既事(阿四,我絕對相信你唔係咁既人,你係因為無能力先去請外傭 :-p),我只好說各人有各人的選擇,我可以選擇不請外傭是因為慈愛天父聽我祈禱並為我準備和供應了一條不用請外傭的路。

  13. eeb

    補幾句,雖然Larry不是哭b,不過他有嚴重濕疹,愛哭的,你還可以狠一下心由他哭,不會死人,嚴重濕疹的,看少半秘就可以抓到流血,為娘我不只要在他清醒時長期注意他的手有沒有抓,更要在他入睡後包好他的手,然後去泵奶和煉藥膏,我也不知道是怎樣熬過來的,只記得在他能夠掙脫被包的手去抓到成了血案現場後,我和老公就開始晚上一人按著他一隻手3個人一起睡,多溫馨﹗

  14. amy

    家家有本難諗的經, 小孜媽說的好,自己覺得舒服開心便好。

    我們家沒傭人,我又自顧上網不喜收拾,就要忍受屋企七國咁亂和爸爸的投訴,也有辣的。

    想到媽媽那時候一人帶三個豆丁,還要煮早午晚飯和車衣幫補家計,就覺得她是個神奇女俠。

    倒是期待你分享與L姐的相處之道。祝事事順利!

  15. amy

    阿四,你讀的那本no-cry sleep solution早聽過le leche league介紹,小D出世後如試過方法有用請告之,或許有天會用得著。

  16. 申報:一樣的臨盆在即, 一樣的請了個菲姐
    我沒能力放工後帶2隻馬騮+一屋功夫,
    再不願, 都投降!!!

  17. siugub

    其實請helper對我最大的吸引力, 只是不用顧著一屋雜務而沒時間同小朋友玩 + 怕自己累脾氣不好影响小朋友

    不過一想到要家中住多個陌生人, 日防夜防, 都係算啦!

  18. 思思阿媽

    我都無阿遮or鐘點
    結果間屋係亂, 亂,再加亂
    老公成日叫我執, 又唔知係屋企對住個生蕃邊有甘多時間執 ..
    我都覺得阿媽好勁, 我+家姐+阿妹+所有雜務, 我同阿妹重要係岩岩細我一年, 真係唔知佢地點揍 ..

    莫非佢地果時唔使上網,唔使寫blog所以多d時間做野 ???

  19. 阿四,當了媽媽便沒了自己,到時日日點遮仔睇住煲湯,你推小D去街,自己透下氣,希望會好d。

  20. 我家亦沒有外傭沒有鐘點,幸運地有一個曾經一帶三的退役神奇女俠婆婆重出江湖.

    每天放工回娘家飯來張口,吃完拍拍屁股帶肥仔開車就走.家中的灰塵一星期打掃一次就夠,我的忍受能力頗高,不愛整潔的缺點亦可以是一個優點.

    肥仔快返學,好大機會九龍人要老遠到跑馬地返學,不為甚麼,只因要屈服於太陽國帝國主義的計劃…神奇婆婆未能(亦不好意思請她)老遠由觀塘跑到跑馬地接放學,太陽國校車亦不會送小朋友到一個成個地方只有一個日人小朋友的屋苑.

    除非有一個我又信得過的司機肯俾我包起管接送,不然我屋企都好大機會要多把遮.

  21. 納奧美

    lousyma一語: 當了媽媽便沒了自己, 真箇精闢, 一語中的.
    很多的堅持, 很多的理論, (當然不是全部), 一點一滴, 原來可以 “妥協" , 可以 “屈服".
    正如數碼港c橋所講, 怎想到阿四可以接受在文章中屎來屎去? 怎想到阿四可以接受徒手淘 “寶"?
    但, 焉知這不是一個成長和突破舊有框框的過程??

    不用菲姐有時, 用菲姐有時; 做阿四有時, 做主母有時.彼時此時各有風騷, 只管儘情enjoy~enjoy!enjoy! 就好了.

  22. 完全贊成納奧美"enjoy~enjoy!"
    我都係冇遮。
    我係好自我又固執既人,我覺得我得一個囡,生得出我就要對負責,真係頂唔順比人亂舞亂教既失控感覺。
    我最初比自己奶奶湊 b,真係頂唔住,所以 c 就 c 啦,都係辭工自己湊返好。
    奶奶都唔得,何況係第二種文化的外國人?

    但如果有兩個小朋友,仲都係咁細,冇外援又真係好難攪。有外援 outsource d 家務都係好既。其實最緊要係教育小朋友一定係自己來。

    阿四好偉大,示範點可以做一個成功攪得掂一家大細阿姐阿遮又教得掂大細小朋友。又可以學到野。

  23. 我都要先申報, 家中有一外傭—-菲姐是也!!!佢最主要既工作就係做哂全屋既清潔, 至於湊b都係由我奶奶, 幸好, 天主給我一個非常開明同易相處既奶奶, 我第一日出院回家, yvonne已由奶奶搞掂, 奶奶說一定要休息, 到我要上班時, 奶奶更能好好照顧yvonne, 既然係咁, 更加要一個菲姐做哂家務, 務求奶奶可以無後顧之憂……專心湊b, 我就一放工回家同yvonne玩, 唱歌, 睇書, 講故事!!!

    當然能夠全職湊b係最好, 但係在hk呢d環境, 多個人工作可以幫輕下老公也是必須既…..

    所以能做full-time mama真係好幸福呀!!!

  24. 通告: L遮拿手菜 « 媽媽阿四

  25. 通告: Bossini條褲 « 媽媽阿四

  26. 通告: 賴小James « 媽媽阿四

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s