吃與拉的邏輯思維


DSC06732

陽明山上農莊餐廳的老闆娘放着大而暖的嗓門,將給小C的高櫈緊挨着媽媽的座位。媽媽把高櫈拉開放得正正經經,小C兩個猴步自己爬上位。

菜牌上列了超過二十種野菜的怪名,老闆娘向我們桌旁樹下的野草一指,呢,那就是山蘇囉。

好,就點這個腳旁山蘇。小C自己嚼着野草,又貪婪地再自己夾餸。

老闆娘端上山豬肉,看着吃得一嘴一臉一身兩手的小食家,跟媽媽說,真佩服妳,孩子居然能服侍自己,一點也不需妳動手!

「因為我懶囉。」

DSC06734lunch

我真是很懶,從不放過任何可以卸膊的機會。從小C兩歲半起--已經算是很遲了,我便立志不再做人肉匙羹,有時心軟,都只會用口餵,用三寸不爛之舌去餵。

中國人有耐人尋味的邏輯思維,其實大多數孩子都要到兩歲才能發展出成熟的肌肉控制,忍住大小二便,但三幾個月大還未坐好便戒片成功的嬰兒,卻爬得一地都是。幾個月大的孩子都懂得拿東西往口裡送,但通街通巷隔籬檯呢,都是可憐天下父母,餵飯餵至三歲五歲六歲。

台灣較少見外國孩子,難怪就算在大酒店的西餐廳內,都只會提供小童匙羹加飯碗,永遠難見半隻叉。因為哦,連小C都知道,用叉餵飯,會插傷口囉。

「愛牠就不要餵牠。」牠,是在台北動物園裡被小C認定為「誇啦啦bear」的猴子。

人的孩子,希望仍然是比牠聰慧一點,幸運一點。

DSC06977DSC06978

(小C2歲9個月)

18 則迴響

Filed under , 小C, , 旅行

18 responses to “吃與拉的邏輯思維

  1. Jenni

    Children have the abilty to do a lot of things on their own,most of the time it is the parents that can’t let go and want the child to be dependent on them.

  2. 對啊! 孩子就算年紀少都有很多事可自已做, 分別就視乎家長願意放手與否.

    我家弟弟一歲四個月大時發現自已能控制湯匙, 自始拒絕比人餵. 有次和朋友吃飯, 人地個仔加上我的共三個男孩兩歲三歲五歲, 大和小的自顧自吃個不停, 三歲的那位只需飯來將口. 不是他不肯自已吃, 而是他娘親不讓他自已吃, 怕食到天一半地一半. 唉, 可憐的孩子, 食到天一半地一半是 age appropriate 的行為, 不讓他在餐廳試, 在家就更加不可能讓他做. 最難頂是他娘一邊服侍個仔, 一邊投訴自已冇得食; 我家弟弟比她的年紀還要少八個月又唔見得我冇得食? 自已攞黎, 唔抵可憐!

  3. 我家公主一食都半飽就停手, 點氹, 點講都唔動手, 有時仲比個匙要我餵, 有咩辦法?

  4. 思思阿媽

    好like呢句"愛他就不要喂他" ..
    但係我重未做到 ….

  5. MAMA

    我都想試下做到! 好,就訂下2.5歲目標,仲有7個月…

  6. amy

    靖愷一歲半,其實兩個月之前我已決心不餵他,是我的要求太高嗎?最近學校的老師如此說了,所以我現在反而寬鬆了一點,有時餵一兩口。或許,自己吃和自己拉的目標都定在兩歲吧?

  7. cc

    hahaha, 我都係定在 2歲 ……

  8. 我不餵,但婆婆忍不住餵…

  9. 我好彩,因為我個囡夠硬頸,根本唔比我餵,一野撥開隻匙,所以迫住大概一歲多D已係佢自己食。諗返果時連幅牆都有飯,好轟烈,ha ! 不過我出去食又反而會多D插手,食到人地成地飯要抹餐飽我會唔好意思囉。
    通常唔比自己食既原因,多數怕污漕,同埋怕食唔飽,都係大人既原因。老人家尤其,我次次同老人家食,佢地都以為我想餓C個囡。

  10. 餵與唔餵之間 及 婆婆戰鬥. 我仍在學習中…. 回想我其實好少時間餵阿仔. 一. 佢要食時, 一定自己食, 旁人唔好攪佢; 二. 佢細少唔食時, 點都唔食. 死未. 三. 其實他蝦婆婆, 有婆婆時, 就要人餵機會多; 得我同爸爸時, 一馬當先, 自己攪點. 當然, 不排除有時要人陪下安慰歡呼鼓勵下, 大家就幫幫手.

  11. siugub

    一歲開始, 在家女兒可以自己餵自己半餐, 但後半餐就開始要玩唔食, 我都未忍到心唔餵. 真要再下定決心先. 我都係希望兩歲前成功啦^^
    但出街我都偏向餵, 一來怕搞烏糟人地地方, 二來係好多地方都無BB highchair或位置唔適合. 都是時候要開始適應街外自己食飯啦.

  12. eeb

    我覺得,唔係幾多個月,定幾多歲要開始唔餵,而係當小朋友ready自己食時就俾佢試,佢未打算自己食呢,咪再餵下囉,佢可以自己食,咪俾佢自己慢慢食到天一半地一半囉,2歲可能係一個指標,但唔係絕對。

    當然我都係會說不會做。

    所以我餵飯用2-3支羹,1支Larry自食,1支我餵佢,1支預佢搶咗我手上o個支時仲有另1支餵佢,可以慢慢食+天一半地一半,但唔准唔食晒。

  13. 好﹗不要寵壞孩子﹗

    三個月戒片就太誇張了。以前尿片不流行,沒尿片就說早點戒片。

    我那時還嘲笑別人的女兒三歲還未戒片,怎知……唉。

  14. 哈哈!, 睇完各位 comment 發現原來我真係幾狠心. 有次六點半開飯時兩歲半弟弟發脾氣唔食, 我同佢講 「媽咪好民主既, 你唔要食就唔好食啦」, 跟住收左佢隻碗.

    開頭佢以為發達啦, 拿拿林去玩. 結果到爸爸八點半放工 , 佢死死地氣攞個碗返黎好可憐同我講「媽咪我肚餓啦」… 結果一路食飯一路比爸爸哦……

    自始每日開飯弟弟永遠第一個埋位!

  15. 同意,我都覺得小朋友應該知餓知飽。
    因為我果個係女,所以我成日阿Q,瘦好過肥啦。大大條道理,由得佢食唔食囉。我最愛一隻健康既小猴子。

    至於戒片,我都努力中啦,戒片最開心最大動力係,可以慳返D尿片$$。
    我以前聽過人地講五歲都未戒,我覺得好恐佈要引以為戒。好啦,到自己,先知都唔係自己話事囉,我家小姐亦唔會睬我逗佢去廁所。

  16. 同意they are ready when they are ready. 如果可以食一半,即是有能力食晒想食的份量。

    菲妮媽: 我用計時器,30分鐘後就收檔。餓過就慢慢知死。

  17. 好, 等我試吓, 不過咁比唔比飯後果?

  18. 通告: 帶一個生番孤身上路 « 媽媽阿四

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s