阿四得罪人多~之~食篇


這陣子得罪人多,今日呢,就唔掙在。

兩年半來,我背脊骨落了無數好心人於我背後或一抽二lung無還擊力時請小C吃的薯條味精餅熊仔餅旺旺XYZ,最終參悟出一套「請小朋友吃零食 食經」,今天希望拋磚引玉,讓大家在此或訴苦或柴台。

請小朋友吃零食 食經

大原則一:想請小朋友吃零食,要先問其家長。

大原則二:想請小朋友吃零食,要先在小朋友不知情下問其家長。

大原則三:忌用其他小朋友訓練自己孩子學"分享"。

理由:

1。世上有1000種奇型怪狀的食物敏感症,但小朋友不認為世上有1000種奇型怪狀的食物敏感症。

2。小朋友可能快要吃正餐,但小朋友不認為自己快要吃正餐。

3。家長可能認為你的零食無益,而小朋友不認為你的零食無益。

4。家長可能認為你的零食太有益,而小朋友不認為你的零食太有益。

5。家長可能認為你的零食100%完美,可惜小朋友也剛剛吃了四十塊該樣完美零食,而小朋友不認為自己剛吃了四十塊該樣完美零食。

6。家長不想在孩子面前跟閣下辯論,害得大家傷感情,看得孩子一頭霧水。

個案研討一

小朋友在超市內看魚。

媽媽在超市內買餸。

職員在超市內百無聊賴。

.

職員:喂小朋友!小朋友!!呢邊呀!我請你吃糖ㄚ。

小朋友:……?

媽媽:哦唔駛啦多謝,拜拜。

職員:好好食架呢種糖。

小朋友:……?

媽媽:佢唔可以食糖,拜拜。

職員:但佢好想要喎。

媽媽:但我好想你收聲喎。

問題討論

個案中母女尚差一個超市印花才夠換領易潔鑊,下次應否冒險再來?

個案研討二

媽媽「被困」大廈升降機內。

Auntie個仔在升降機內吃____(自行填充)。

小C在看Auntie個仔的球。

.

Auntie:阿仔你叫人啦。阿仔你請小C吃____啦。

Auntie阿仔:不!

小C:……?

媽媽:哦其實呢……

Auntie:要分享呀!快來,請小C吃。

Auntie阿仔:不!不!不!

小C:……?

媽媽:謝啦,小C剛吃了……

Auntie:我把____沒收啦!要分享呀!快來,請小C吃。

Auntie阿仔:不~~~~~~~!不不不!哇~~~~~

小C:……???

媽媽:噢你這波波在哪裡買?……噢噢我們到了……不我們沒搬,我們最近開始想多做運動走幾層樓梯啫……

問題討論

個案中母女提早多少層離開升降機?

25 則迴響

Filed under ,

25 responses to “阿四得罪人多~之~食篇

  1. 我都十分極之不喜歡, 有些人卻十分之喜歡, 隨意請小女食佢地以為應該食既零食/糖果/飲料, 那些紙包什麼檸檬茶果汁乜汁物汁, 簡直超級無敵多糖多防腐劑多色素……..

    好心做壞事囉
    好心做壞事囉
    好心做壞事囉
    ………
    ………
    ………
    ………

  2. 個案研討三:
    已再三拒絕好意明示小朋友不需吃糖, 但人地 既公公婆婆*明明冇撞聾仍然堅持要請甚至拆埋糖紙將糖放埋入小口中, 咁應該點做呢? 阿四有何高見?

    *即朋友既阿媽阿爸, 係長輩但又唔係話好熟果種.

  3. 米搞

    阿四老師,我有問題:

    如果小c既父母都係唔食__(自行填充),咁,小c食一次都唔會養成習慣...呱?

    又,如果係怕敏感,咁,唔係响父母面前試過敏感,好過第二時响小朋友不知明情況下食到?

    抑或,你都只係等緊小c到一個可以理解事物既年紀然之後再解釋俾佢知垃圾既害處,然之後俾佢選擇?

    呢,我唔係义論厨你呀,真係想問吓既...

  4. Tam Koon

    你細個陣到而家都都未放過零食入個口,淨食生果咋?

    我淨諗起人點養參展狗,或者係個籠入面做實驗猩猩。

  5. 菜芯媽

    現在還好的反應是,
    小C:……???
    我怕,下次當儲夠印花換領易潔鑊時,
    小C:媽媽,買____(自行填充)丫。

  6. 個女偶然食左零食我尚可接受,但我最憎人

    自己食緊又比我個女食,
    飲緊又比我個女飲,
    自己食過筷子又夾野比我個女,
    附送口水之餘仲要話比阿女個媽咪(我)聽自己d口水冇菌喎!!

    我想話:我成個棟响度,我照顧得啦,唔洗你地好似餵雀咁啦,唔該!!
    ...

  7. 每個家長都有自己教小朋友的一套, 我自己的原則是不影響人地教囝囡就最緊要。所以我唔會請人地D小朋友食糖, 但, 亦唔想人地請我的BB食糖。

    至於分享的問題, 有D家長將分享無限上綱成為凡物公用, 我又覺得, 分享要甘心樂意同埋不必要令小朋友覺得蝕底左, 須知道: 每個小朋友都有其最寶貴、最珍重的東西, 強行要佢分享, 會變成反效果。

  8. 天藍媽媽

    小朋友長大後大把機會食糖果食junk food,我只係希望小朋友健康多幾年,同埋知道食物嘅「原味」係點。

    我都唔明點解有啲playgroup完場前硬要每個小朋友塞一粒多糖多色素啫喱糖棉花糖比佢地?好彩我個仔而家都仲鍾意同我分享,我大份佢細份咁食咗粒糖。

    我也試過反客為主先請朋友仔食士多啤梨食藍莓食rice cracker食飽佢地個肚,點知朋友仔爹哋一句「哎呀咁多謝呀我請返你地食雪榚呀!」而前功盡費。

  9. 阿四,你讲出了我的心声啊!!我从来都不给糖果一一,加上一一有敏感底,我真的好怕别人乱给一一东西吃,仲要吾话我知,或不停讲 “吾怕啦,吾避得甘多咖啦”。是否一一脸/咀唇/身痕你帮他R先?问过我我也可能会说好,那大家都有面,多好呢?或到了便利店/商店,有店员见一一可爱,便不由分说地在我背后给一一贴纸/玩具,但我不希望一一learn to get things so easily or take things for granted,or learn to take the easier route and bypass me things or 先斩后奏。但不给也给了,那我怎办?教坏晒。之后我也不再带一一到那便利店/商店。以前我是一个颇含蓄的人,但为了个仔,现在得罪人都不理了,会直接话人。如果其他小孩想吃一一的饼干,将心比己,我亦会问过其家长才会比的。
    所以我的答案:
    Case 1: No
    Case 2: 我想你十层也不怕!!
    好多谢你比个位我呻!!
    呻完,好舒服!!

  10. 阿四,我諗你可以再去超市,因為個職員應該會避左你,你唔洗驚!哈哈!

    其實,我唔係俾好多零食個仔食,因為留返啲quota俾人哋請佢食啲無益既野!有時,唔俾佢試/食,好慘既!(不過,大啲至好試,細,唔洗試)

    如果,有呢啲咁既情況又唔想得罪人,我會收左『禮物』先,話遲啲至再俾個仔食!如果攞唔走既,就搵個藉口(熱氣、咳...)推左佢!

  11. 思思阿媽

    阿4媽 ..
    你講出哂我既心聲 … 都唔明d人做乜甘鍾意比野人地d細佬食 .. 要食佢阿媽我唔識去買咩 ..
    我細個好乖, 人地比野食一定問過阿媽先會攞or食 .. 我都會教思思要好似媽媽甘 ..
    我都好唔like思思食人地d口水尾 .. 阿婆/思爸除外 ..
    case study 1: 會照去, 去到扮睇唔到個阿姐, 一日未夠印花都會去
    case study 2: 行幾多層都制啦 .. 再唔係見有人係lift就死都唔入 .. or 行樓梯lor ..

  12. 各位在這裡呻的父母: 呻得真過癮!

    米 : 呵呵呵,只要是像你一樣的理性討論,就算真是差論厨,都絕對是無任歡迎! :)
    我想問題的癥結是兩個字,正如Kanris及其他commenters的意思: 尊重。

    其次,就是年齡。

    我尊重別人,便不會倒米,對別人的孩子說不要用幾萬蚊買套Disney教才。就算真的真的真的忍不住(我還可以忍),就對成年人說囉,我才不要對孩子說。所以,才有之前"你試吓同我教女ㄚ嗱"的一篇。
    我貪得意對小朋友說了,說完我拍拍屁股,甚麼後果也不用對付,就是不尊重囉。

    例如食糖,不錯家裡是沒有,但下次在超市見到,想起明明上次媽媽沒阻止,便lur!那麼這次媽媽又要編出甚麼故事來安撫才好?

    一粒甜食不上癮,十粒不同人的甜食,還不?

    至於敏感,我如果要試,我可以私下試,真的無需旁人at random的試。

    總之,就是尊重二字。

    我也尊重孩子,上天賜下1000樣可口原味(謝謝天藍媽媽提示)的美食,我每天請她選。(OK,當木瓜太熟要幫手食時例外。)她每天生番似的瘋跑損手爛腳,我由她。她躝地,眾人忙勸止,我由她。她不要對樓下怪叔叔叫早安,我由她。

    米兄你說得很好:"等小c到一個可以理解事物既年紀然之後再解釋俾佢知垃圾既害處,然之後俾佢選擇"。
    其實我以經解釋了,她知道糖會爛牙,自己都不會吃,但有時就以為包裝上畫了士多啤梨的糖是士多啤梨……

    Tam Koon: 我想你仍不明白大家在說甚麼播。還有,閣下這麼擅於人身攻擊,真慶幸我不認識你。

    Kanris: 你的分享論,真係中晒我心呀!!!

    馮C9: 唉都好R頭播,可唔可以用zacharyhui個方案?

    另外我又試吓加多一招:分心大法。通常人之所以要請食野,都是想有D貢獻,可以從佢開始作勢攞糖一刻,突然9唔答8一論嘴話:呀auntie你件衫隻蝴蝶真美,可以讓孩子摸一摸嗎?Auntie你家鄉話講早晨點講?可唔可以教小朋友?Auntie我小朋友熱氣,你認為煲mud湯好?etc.

    之後,走得的話就再distract小朋友一齊走開,走唔開就拉auntie走開,研究佢D相簿之類……

  13. eho

    HAHAHAHA!! talking about that disney thingy, do you notice that it has become a household necessity (just like ricecooker, fridge) in HK? i’d rather use that several ten thousands to hire a native speaker to do real-man-show and teach my kids english.. sorry i might hv offended many people, but i seriously don’t believe learning a language through TV..

  14. 石仔媽媽

    我十分同意那些“慷慨”的人真叫我頭痛…慶幸小兒的學校沒有零食,以致他仍然是“薯片zero exposure”…其實媽媽呀四你唔駛太勞氣,好傷身…不如叫小C隨身帶一個“兩格sharing bag”,一於當人地好心做壞事的事候擰袋裏面請人食,以作還擊,又可以請對方品嚐小C的佳餚…然後將人地請食的放在另外一格,待晚上數點,然後count your blessings,因為呢個世界有好多人覺得小C得意,所以請佢食…但係因為daddy 冇同小C出街,遇不上這些好人…所以就將“戰利品”送俾daddy欣賞啦…

  15. amy

    阿四你這兩日的兩篇,真能反映這個世界有多怪。有些人會多一事不如少一事,怕多說一句會有人以為他是瘋的;但到真正要沉默是金時,有些人又會忍不住來爭著說爭著請。

  16. 苦爸爸

    本來這篇不想留言,但係見你咁勞氣,不如講我成日點"串人" 的話:

    未拍過施的拍施專家 ;

    未生過的湊仔專家

    (當然,真有這類很掂的專家)

    仲有就係,我知甜品好好味,人家不吃就不吃啦 ; 可能人家怕甜呢,又可能佢係糖尿病人呢~~~

    問一下無妨,知你好心,不要監人乃後啦,好嗎。唉 !

  17. 朋友的教仔絕招:

    為免小鬼日後扭去麥當當,於是,有一天,爸爸帶小鬼入去麥當當,著姐姐畀杯清水,從此,小鬼對麥當當的印象就是一杯無味的水…

    哈﹗絕﹗

    我遇過最經典的,是當我囡囡六個月開始食固體食物時,一次去飲茶,親戚竟然話:「畀隻鳳爪BB食下…」真係奇過幻海奇情。

  18. eho: right on!!!

    石媽: 呢條橋,果然絕

    苦爸: 好正的專家!

  19. 通告: 是日金句 « 媽媽阿四

  20. 我諗緊製造個點樣ge scenarion將妳呢篇教材分發比我community裏的一眾人等. (最好係報紙刊登, 咁我當剪報影印, 一於借妳過橋)

    Case I: 應該去. 妳投稿啦, 等報紙登, 然後剪低影印定份旁身. 一見到超巿職員/電梯Auntie/……就送他們一份, “哈你睇, 報紙話唔好立亂比野人地細路食喎……" (一於借助傳媒壓力)

    Case II: 阿四識野, 走為上著. 提早幾多層唔緊要, 但如果無其他住得低d的人一齊搭電梯, 我驚妳走唔甩喎. 咁啦, 未有剪報前, 最後一句對白可改為: “媽媽:噢掛住講, 唔記得要同小c多做運動tim (說時要留意電梯去到幾多樓, 眼明手快地按下最接近果幾層樓個掣–千萬別只按一個—等門一開)…去做運動啦, bye-bye"

    阿四講得好. 關鍵係: 人地個仔/女, 我地就米亂搞啦.

    唔唔單止請食零食, 也適用於如何回應一切別人父母不知情/未出聲表態前, 別人孩子向你提出的任何要求.

  21. desperate mom, Katty

    Love your parallel structure!! It’s so entertaining to read. I think you are creating a mamaah4-ism here! Way to go, girl!

  22. wybau

    我呢d好世界仔架, 為免麻煩, 通常我會照單全收, 不過唔會再發放俾囡囡, 再加埋分心大法, 乜有糖咩? 呢招尤其適用於老爺奶奶及其他長軰身上.

    其實我地又怎可以阻止別人做什麼說什麼, 仔女始終係自己, 作為家長只可以用平和的方法去打完場.

  23. 阿四老師, 請教一下, 請問如何回應姨媽姑爹親戚們這些好意???

    個案1 –
    “肥肥食糖糖啦!" 說時遲那時快, 當媽媽未及阻止時, 肥肥的嘴嘴己塞滿糖糖…

    個案2 –
    每當親戚們見面, 某位媽媽總會被姨媽姑爹們責罵 “成歲人仔你乜都唔比佢食! 你點做人阿媽0架!!! 你細個我咪又一樣咁咁咁咁咁…." 當某位媽媽嘗試解釋時, 總會比人再罵多三千字…

    而wybau那招, 完全無效呀! 那姨媽姑爹親戚們, 總要親眼睇實你比佢食食為止!

    做人阿媽, 真係什艱難…

  24. 納: hahahha用photoshop都可以整到報紙效果啦 ;)

    " 也適用於如何回應一切別人父母不知情/未出聲表態前, 別人孩子向你提出的任何要求" 
    -- 係呀係呀,well said well said!!!

    Katty: wow, “mamaah4-ism"!! i like this term!! hahaha thx 🙂

    milkycandy: 正如wybau同埋D姨媽姑爹話齋,仔女始終係自己的,你係人地阿媽!!你細個時,佢地為所欲為;而家,無論如何都輪到你為所欲為。

    如果是祖父母,尚且值得動之以情,說之以理。再不,還是那句:分心大法。

    其他人呢,我的方法其實是走為上着。。。
    有時要接受,世上有些人,真是少見為妙。

    嘉嵐媽: 歡迎你! :)  嘩,深入虎穴橋,絕!
    不過孩子應該還很小?

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s