奶奶屎之猛於虎


可喜可賀,最近Pampers推出一種人奶B尿片,報稱能捕捉初生人奶B的爆炸大便水云云。小C小C,真是生不逢時。

要明白這新玩意的吸引力,先得了解其吸收對象--奶奶屎。

奶奶屎之猛於虎處,在於其急、其狠、其爛,三者缺一不可。純人奶極易被消化,殘餘物資稀稀劈劈,瞬間即出。一出,何止如山洪暴發,那是原子彈!奶奶屎以汎濫全片為宗旨,飛出片頭為目標,滲透全身為收科。以此配合周身郁手多多B乙個,換片時必收滿堂屎之效。

哦你認爲這是煉獄?當你解開屎片,埋首膜拜裏頭那沼澤之際,小朋友必然會決定,嘩,此時不發原子彈續集,真是更待何時?

我就曾屢次抱着一個奶奶屎人,等足大半句鐘,只為待爹爹歸來,同換此片。

小C七個月大時正式開始吃固體食物,奶奶屎於數天間被馴化為固體。媽媽一看,不得了--人類果然為犯賤動物:「天!還我奶奶屎!!」半年來以自己身體獨力餵飽一個肚仔,那種牽繫,那種滿足,原來會叫人癡線。男士們,倘有天你一覺醒來,發現手瓜會擠出一碗又一碗的雲吞麵,自當明白。

小C剛滿21個月大,日奶奶已由乳酪代替,但夜裡還是要苦纏奶奶才能入睡。最近每晚跟她洗腦,給她看一張又一張小朋友獨自睡覺的圖片--

「這小朋友跟誰一起睡?」

理所當然:「Bear bear!」

「這小朋友會吃奶奶嗎?」

一口咬定:「不會!」

「那小C跟誰一起睡?」

思路仍然清晰:「Bear bear!」

「小C會吃奶奶嗎?」

言之鑿鑿:「不會!奶奶…… sleeping。」

「對了,小C跟bear bear睡吧。」

「哦…… 哦…… 哦…… 奶奶!奶奶!!奶奶!!!哇-----」講笑搵第樣。

只是到一天她真的開竅,宣佈撤底放棄奶奶之時,各位,請阻止我再來犯賤。

廣告

28 則迴響

Filed under , 阿四, 媽媽奶奶, 小C, 母乳

28 responses to “奶奶屎之猛於虎

  1. 哎呀, 真係要戒一邊食飯一邊睇妳個 blog. 之不過 換片箇中辛酸真係有誰共鳴~ 😀

  2. Cammy

    好在今日同事冇返, 因我忍受不了笑了出來

  3. y-ee

    笑死我喇!連Poo Poo 都寫得咁精彩。
    妳枝筆猛於虎也。

  4. 哈哈哈哈﹗(笑聲震天,好彩冇飲水,如果唔係,成個芒都濕晒)

    呢篇勁呀﹗阿四一發功,果然屎勁十足。

    贈你一個真人真事(不是我):

    有一個年輕媽咪,個B有一晚發屎功,過程只能用一個爆字來形容。媽咪好驚,身邊無人,於是打999報警﹗

  5. mag

    hahahahaha………….好文彩~~~

  6. 奶奶屎之勁,非旁觀者能明白的。

    諗起都想笑。

  7. 多謝各位!有誰共鳴!

    readandeat:搵次我要quote你個999事件先得!!!!!!!
    By the way,(在你面前當然要中英夾雜過吓癮)我呢幾次之所以會暢所欲屎,搬出個屎字,全因想起你的屎炕種菜事件:「哦連readandeat都寫屎屎,咁即係可以寫,係politically correct啦!」
    咁囉。

  8. 不是屎坑種菜,是屎坑上的菜。哈哈﹗

  9. 原本放咗工想去老麥買杯朱古力奶昔….. 而家.. 可以慳番

  10. 一早起身稿完七十單野,終於坐下來飲杯茶讀下阿四,哇!成個人醒晒!!多謝你給我一天哈哈笑的好開始!
    補充小小:奶奶屎之顏色幻變,由濃淡不同的綠,到由淺入深的啡黃系列,拍得住印象派大師的夢。。。

  11. 納奧美

    haha, 精彩精彩!!!

    我第一次親手幫囡囡沖涼 (還在坐月期間–因為陪月下班了) 就是因為換片時遇上99c洪暴發,眼前囡囡頓變奶奶屎人, 而我在猶豫了二分鐘是否應該等一個小時讓爹爹回來處理後, 便當機立斷動手為軟腍腍的囡囡沖涼!!!此後我就跟囡囡一同愛上了每次的沖涼時間了—–不過就換來了一雙又痺又赤的媽媽手…..

    還有自從見過囡囡的99c後, 除了wasabi,甚麼法國芥辣英國芥辣都不再想吃了, 因為實在太像……

  12. Kam

    奶奶屎之出現, 飄忽不定, 次數不限. 正當你以為它已走遠時, 又會來一招老虎回頭, 令你避無可避. 有時甚至帶着一股屁流而至, 狀甚恐怖. 小女子就曾被奶奶屎+屁攻擊, 結果嘴唇受襲, 至今猶有餘悸! 但每當數天不見奶奶屎出現, 又甚為思念, 此為人之矛盾也!

  13. 我也被空襲無數次。哈哈﹗

    忽然又想起另一個真人真事(不是我)。

    老豆跟BB洗澡,不知是否太舒服,BB竟然就地正法,結果越洗越污糟。

  14. 霄九里:朱古力奶昔咁肥,你要多謝小C幫你慳番呢啲無謂錢喇。

    各位奶媽:我能夠抛cc引cc,得聞大家奇聞,真係大快人心哉。

  15. 香港朋友寄給我看你的BLOG。於是這幾個晚上等夜奶呼喚的時光有得不停哈哈笑﹐實在喜歡﹗碰巧﹐我的CURRY事件第二晚﹐就看到你的奶奶屎。幾乎想同你握手認識一下。

    不過﹐到底PAMPERS那隻是對付奶奶屎的﹖我在美國怎麼沒看到﹖

  16. 歡迎你!我都俾你Dcurry笑死臭死。。。

    我是在日本那本翻譯的Mo Baby上見到的,可能只是香港有?美國的website都看不到。

  17. 引用通告: 遠遠在馬槽裡remix « 媽媽阿四

  18. 引用通告: 3小時空巢支援系統 « 媽媽阿四

  19. 引用通告: 你試下掂奶奶ㄚ嗱 « 媽媽阿四

  20. 引用通告: 靚女口中的香屁 « 媽媽阿四

  21. 引用通告: 生仔16事 « 媽媽阿四

  22. 引用通告: 母雀臨盆 « 媽媽阿四

  23. 讀舊文依然好讀, 阿四你功力真深厚,
    有誰共鳴? 唯乳娘也!

  24. AuntieJo

    呢篇笑死我喇…

    禽日多咗個姪女, 都係食媽媽奶,
    要快D話比我細佬同弟婦知,
    換片時記得帶口罩.

    嚇屎…笑屎…(好彩係人哋姑姐咋, 係阿媽真係–做–屎–人–囉!)

    Thank you for your effort. 我會刨好呢個Blog!

  25. AuntieJo

    Mama4

    唔好講慚愧, 實在我覺得你同周游媽媽簡直係環球親子關係大使, 和諧社會建設示範單位, 儒家倫常重植委員, 只係爭咗未接受委任狀同埋係台上揮手兼繞場三周半.

    請你哋繼續寫, 等好多人可以學習, 做父母嘅開眼界, 做細路仔嘅脫苦海, 咁呢個世界就會變得更美麗…真的!

    (我又企圖誤導人, 前日我屋企人已經更正過我, 但係我死不改過, 我打算一直誤導我姪女, 直至我嫁得出有得生為止, 我諗佢會响大雅尺牘度知道我真正身分, 但我想教埋佢心理 – 呢樣叫 : 老姑婆稱謂情意結.
    話時話, 呢個世紀, 哪來大雅尺牘呢? 唔…真係好老, 哈哈!)

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s