盼了兩天，千呼萬喚始出來，終於讓我等到那顆車梨子核－－呢就在那小小消化系統的盡頭，燈火欄柵處。
是這樣的，話說這小朋友愛吃車梨子：「車－－！」
每天切車梨子將指甲裙黑邊的生活不好過，喂不知陛下是否會考慮自行開金口，自己龍吐珠？
「嗱小C妳看媽媽。吐！好嘢！！」
「嗱小C妳再看媽媽。吐！好嘢！！」
「嗱小C妳再看……」
「嗱媽媽妳看我。吐！好嘢！吐！好嘢！！」
弊，那只是兩塊車梨子皮。
打開金口看看，其餘殘骸已然全數吞沒。喂妳平時從蛋白裏吐蛋黃又咁巴閉！！？
好嘞，而家點算。
咦阿四我以為妳會一早有全盤應變措施，兼夾做足功課看「車梨子核與幼兒消化系統及其心智發展之關係」？
唉歲月磨人，孩子設的爛攤子更是消磨意智，我的危機處理哲學已漸被提煉至「煮到嚟先算」的級數。只要不是會令小朋友啃死得很難看，又或需要收拾殘局、令媽媽臉色很難看的事，都盡量由她亂來，煮到嚟先算。
說回小腸內那顆種子。「More more! Please!!」小朋友明顯享受得很，對媽媽的百分百信賴更是跟一分鐘前無兩。媽媽呀媽媽，妳還懶懶閒咁，究竟有冇良心？
好好好……我上網查囉。
不查猶自可，一查－－－資料說，車梨子核吃得多會……中毒？徵狀包括神神地和懞盛盛等各樣各樣，而更甚者，吓，可能會一命嗚呼！？
接下來的36小時，小朋友果然出現神神地和懞盛盛等徵狀，呢就跟平日一模一樣，也真夠令人忐忑。
終於，終於，小小消化系統終於在今晨有所出，媽媽趕忙在尿片内翻箱倒櫃尋寳，亦總算有所交待。感激不盡之餘，開始明白禦醫研究王上寶物的那顆仁心。
¤
本來已替車梨子核準備好大特寫照片，但最後將心比己，想想倘若小時侯我的金照曾被暴光，大概要從此心理不平衡吧，個blog亦恐怕要變成怨女阿四之類了。於是圖文並茂大計就只好作罷，還請見諒見諒。
（後記：嘩，各位觀眾，有解決方案嘞，請看：車－厘－子－去－核－器！！）
我阿仔細個吃了很多提子核……
我細細個時在戲院曾呑下一角硬幣, 之後被餵了大量大蕉後, 才離開我身. 現在, 黃金中的銀幣更被真而重之地放在保險箱內.
I can only imagine how lor lor lyeun you were during those 36 hours. My sister stuck a dried green pea into her nose when she was a toddler. We rushed her to QMH emergency room :-p
各位，請聽聽我的故事。(唔好意思寫咁長)
話說有一天，兩歲的包走過嚟同我講：「個一仙唔見咗﹗」
乜嘢唔見咗？一仙？你放喺邊度唔見咗？
包張開大嘴，指住條脷：「喺條脷下面。跟住唔見咗。」
唔係丫嘛﹗？你有冇記錯？
「我唔記得啦﹗」
有冇搞錯？
馬上告訴廚神，廚神上網找資料，話六成細路都會將一仙硬幣吞下肚。其中大部分都會自己排出，咁……仲有少部分排唔出的，入院開胃﹗
馬上打咗個突﹗
於是，每日廚神負責做搞屎棍。仲特別打電話去幼兒中心：唔該將啲大嘢留底，讓我們拿回家檢查。
過了三天……
中午，在辦公室收到廚神電話：找到了﹗
而家那個一仙硬幣已收藏好，第時俾佢睇番。
我以前細個以為吞香口膠會死人，所以好專心坐定定咁食，真係「神神地和懞盛盛」。
http://hk.knowledge.yahoo.com/question/?qid=7007011602292&others=1
to阿莫：
乜唔係架咩？我都係咁喎。不過，上次女兒吞了整塊香口膠後，我也知道自己是緊張過度了。
真係好味又精彩。
哎呀醒唔起要收埋粒核第時俾佢睇添
阿四，估唔到您咁快（在我還未來得及寫完下列）就俾成粒車厘子小C食：
小C長大後，有一天一大啖咬落去才嚇然發覺完來車厘子是有核的！且還是佔了大部分的比例！小C，您看看媽媽多寵愛您，為您挑選最深色最甜最多汁最好的車厘子、為您預設（並消毒 most probably）剪刀、為您逐小塊逐小塊剪成大小適中的…
請考慮若您收埋粒核的情況／後果，因以上其他小朋友吞下的是死物也，而小C的核卻可能與她一起成長！
hee hee冇成粒，係半粒遮
笑死我喇媽媽阿四！你的幽默感好厲害，中文描述行雲流水，要出書！借問小Ｃ是否在花旗國出世的？講gum多番文０既。
嘩Lousy Ma你真係tum得人哋好鬼開心架遮。
小C是個港產B，不過去英文playgroup，搞到我平時同佢講埋曬啲英文。